“A krea tur kos pa medio di djE i sin djE nada no a haña eksistensia” (Juan 1:3).
“A krea tur kos pa medio di djE, Hesus, i tòg, di akuerdo ku Skritura, “Hesus a yora” (Juan 11:35). E Kreador a yora? Mas ainda, Hesus tabata “despresiá, bandoná pa tur hende, un hòmber ku konosé doló, ku sa di sufrimentu” (Isa. 53:3). E Kreador, un hòmber di doló, despresiá i rechasá? I un bia El a grita: “Mi Dios, mi Dios, pakiko Bo a bandoná Mi?” (Mat. 27:46).
Kon e kosnan akí por a sosodé? Ta pasobra Hesus, nos Kreador, tabata tambe nos Redentor, i komo tal E tabata e Dios Krusifiká, e Kreador kende a bisti humanidat i den e humanidat ei a sufri a traves di un bida di privashon i trabou duru ku a terminá kunE kologá riba un krus romano.
Pues, nos Kreador, esun den ken “nos ta biba, move i eksistí” (Echonan 17:28), a sufri den humanidat den formanan ku niun di nos hamas lo tabata por. Nos por eksperensiá solamente nos propio dolónan, nos propio tristesanan; na e krus El a karga “nos enfermedatnan i ta nos doló el a soportá” (Isa. 53:4), nan tur. Esei ta e akto di mas maravioso den henter historia kósmiko.
Ku e trasfondo ei (esun di e Dios krusifiká ku ta bira visibel pa nos), pa e siguiente par di luna, nos lo trata na komprondé mihó loke ta inkomprendibel: nos propio sufrimentu, e sufrimentunan di kristiannan, di esnan ku a komprometé nan bida na Kristu. Nos no ta pretendé di tin tur e kontestanan òf asta hopi; nos ta afirmando solamente ku “Dios ta amor” (1 Juan 4:8) i ku, aunke e kosnan akí ta sosodé, nos por konfia Dios apesar di nan i, di bèrdat, krese den grasia pa medio di nan, no importá kon doloroso e proseso ta.
E kuartal akí nos lo studia e Palabra di Dios i mira kon otro karni i sanger, aunke radiá den fe, sinembargo a enfrentá desesperashon, traishon, desapunto, pèrdida, inhustisia, i abuzu (ta zona manera kualke kos ku bo por relashoná kuné? Kon nan a dil ku nan? Kiko nan a siña? Kiko nan ehèmpelnan por siña nos?
Ora nos ta wak e hendenan akí, nan eksperensianan, nan luchanan, i nan pruebanan di fe (kua kisas por ta hopi manera di nos mes), nos mester mira nan semper kontrastá kontra e trasfondo di e Krus. Nos mester kòrda semper ku, no importá kiko niun hende ta enfrentá, Hesu-Kristu, nos Kreador i Redentor, a pasa dor di pió.
Nos Dios ta un Dios ku ta sufri. Asta Albert Camus, apénas un kristian, a komprondé algun di e implikashonnan di e Krus i e sufrimentunan di Dios einan: “E anochi riba Golgota ta asina importante den historia di hende solamente pasobra, den su sombra, e divinidat a bandoná su privilegionan tradishonal i a bebe te na e último drùpel, desesperashon inkluí, e agonia di morto.”—Albert Camus, The Rebel (New York: Vintage International, 1991), p. 33. Of, manera Ellen G. White a ekspres’é: “E krus ta un revelashon na nos sentidonan dòf di e doló ku, for di su komienso, piká a trese na e kurason di Dios.”—Education, p. 263.
Nos lèsnan no ta un teodisia, e hustifikashon di Dios den kara di maldat. En kambio, manera nos a bisa, nan ta un intento pa yuda nos pasa dor di e sufrimentu inevitabel ku nos tur ta enfrentá aki den un mundu den kua piká ta mes fásil ku halamentu di rosea. Loke nos ta trata na mustra ta ku doló, sufrimentu, i pèrdida no ta nifiká ku Dios a bandoná nos; nan ta nifiká solamente ku, asta komo kreyentenan, nos ta kompartí awor den e destino komun di un rasa kaí. E diferensia ta ku, pa medio di Hesus i e speransa ku E ta ofresé, nos por haña nifikashon i propósito den loke ta parse insignifikante i sin propósito i ku, di un òf otro manera, asta si nos no por imaginá nos mes kon, nos por konfia e promesa ku “tur kos obra huntu pa bon pa esnan ku ta stima Dios” (Rom. 8:28), e Dios kende, aunke El a traha tur kos, a sufri tur kos tambe (i ta p’esei nos ta stim’E).
Gavin Anthony, e kontribuyente prinsipal di e kuartal akí, a lanta na Sri Lanka komo yu di un mishonero. El a traha komo un pastor na Inglatera i tabata presidente di konferensia na Islandia ora el a skirbi e lèsnan akí..
*Krisol ta un kanika den kua nan ta dirti metalnan presioso pa purifiká nan.